-
Makabuluhang Kawalan
ni Estancio Hugnatan
Sa hanging malamig dama mo ang init
Pagkat yakap ka nitong buong-buo
Pagkat may binubulong itong pagsamo
Sana’y sa hangin na umiihip
…marinig mo ang
bulong ng damdamin.
Sa pag-ihip ng hangin, magkukumpulan ang ulap
Tatabing sa kainitan ng araw na laganap
Tatabing sa katamisan ng buwan sa alapaap
Pati na rin sa mga bituing gabay ng nasa dagat
…pagkat naririto ka na’t sa
buhay ay patnubay.
Sa simoy ng hangin malalasap ang matamis na pagsinta
Di mawawalan ng kasama kahit pa mag-isa
Pagkat nakakausap ang hangin at sasagot siya
Iihip sa iyo na tila tumutugon nga
…mga kaganapang nakahanay
para sa kaganapan.
Sa daloy ng hangin na tumatagos sa katawan
Ramdam sa pagitan ng mga daliri’t kalamnan
Kumikiliti sa ilalim ng tainga’t mga pilik-mata
Umalis ma’y mananatili ang nadarama
…umiihip pa rin ang hangin kahit
katawa’y wakas na ang buhay.
Sa hangin madarama ang Diyos
Na lulukob sa pagkatao’t papasukin ito
Hindi ka malulunod kundi’y mag-aalab lalo
Lahat ng kagandaha’y madarama mo
…Diyos ay nasa hangin.
—-at Diyos ay pag-ibig.
